Roli i fondit “Vendlindja thërret” në luftën e Ushtrisë Çlirimtare të Kosovës

Résumé

Në kuadër të Ushtrisë Çlirimtare të Kosovës (UÇK), si organizatë politiko- ushtarake që veproi nga viti 1994 deri në vitin 1999, fondi “Vendlindja thërret” (4 dhjetor 1993 - 15 gusht 1999) zë një vend thelbësor. Ky fond, i themeluar nga Lëvizja Popullore e Kosovës (LPK), ishte mekanizmi qendror financiar që mbështeti gjithë veprimtarinë e UÇK-së deri në përfundimin e luftës. Ai u kthye në simbol të përkushtimit dhe sakrificës së diasporës shqiptare, e cila përmes tij kontribuoi në mënyrë të strukturuar në furnizimin e luftës me mjete materiale, pajisje ushtarake, ndihma mjekësore, logjistikë dhe mbështetje morale. Fondi “Vendlindja thërret” u shtri në të gjitha qendrat kryesore të diasporës shqiptare në Evropë dhe në Amerikë, duke dëshmuar një nivel të lartë organizimi dhe disipline financiare. Ky punim mbështetet kryesisht në burime dokumentare me proveniencë ushtarake dhe organizative të UÇK-së, shtypin e kohës, si dhe dëshmi të drejtuesve ushtarak. Qëllimi i kumtesës është të shqyrtojë dhe të analizojë në mënyrë objektive rolin strategjik të këtij fondi në realizimin e qëllimeve të Luftës Çlirimtare të Kosovës.